Gen 7 | NdeIBE | STEP | UJehova wathi kuNowa, “Ngena emkhunjini, wena kanye lendlu yakho yonke, ngokuba ngikufumane ulungile kulesi isizukulwane.

Genesis 7

1 UJehova wathi kuNowa, “Ngena emkhunjini, wena kanye lendlu yakho yonke, ngokuba ngikufumane ulungile kulesi isizukulwane.

2 Ngena lezinyamazana eziyisikhombisa ezemihlobo yonke yezinyamazana ezihlambulukileyo, enduna lensikazi, lezimbili ezemihlobo yonke yezinyamazana ezingcolileyo, enduna lensikazi yayo, 3 njalo eziyisikhombisa zezinyoni zemihlobo yonke, ezinduna lezinsikazi, ukulomba uhlobo lwazo emhlabeni. 4 Ngemva kwezinsuku eziyisikhombisa kusukela manje ngizathumela izulu emhlabeni okwezinsuku ezingamatshumi amane lobusuku obungamatshumi amane, njalo ngizakhucula lapha emhlabeni sonke isidalwa esiphilayo engisenzileyo.”

5 UNowa wakwenza konke lokho akulaywa nguJehova.

6 UNowa wayeleminyaka engamakhulu ayisithupha yobudala ekufikeni kwezikhukhula zamanzi emhlabeni. 7 UNowa lamadodana akhe lomkakhe kanye labomalokazana bakhe bangena emkhunjini ukuphepha amanzi kazamcolo. 8 Ngazimbili izinyamazana ezihlanzekileyo lezingcolileyo, ezezinyoni lezezinanakazi zonke ezihuquzela emhlabathini, 9 ezinduna lezinsikazi zeza kuNowa zangena emkhunjini, njengokulaywa kukaNowa nguNkulunkulu. 10 Kwathi ngemva kwezinsuku eziyisikhombisa amanzi kazamcolo eza emhlabeni.

11 Ngomnyaka wamakhulu ayisithupha wokuphila kukaNowa, ngosuku lwetshumi lesikhombisa lwenyanga yesibili – ngalolosuku yonke imithombo yolwandle olukhulu yadabuka, lamasango amanzi amazulu avuleka.

12 Izulu lana emhlabeni okwezinsuku ezingamatshumi amane lobusuku obungamatshumi amane.

13 Ngalonalolosuku uNowa lamadodana akhe, uShemu, loHamu loJafethi, kanye lomkakhe labomalokazana bakhe bamadodana akhe womathathu bangena emkhunjini.

14 Babelazo zonke izinyamazana zeganga kusiya ngemihlobo yazo, zonke izifuyo kusiya ngemihlobo yazo, zonke izinanakazana ezihuquzela emhlabathini kusiya ngemihlobo yazo lazo zonke izinyoni kusiya ngemihlobo yazo, yonke into elezimpiko. 15 Zeza kuNowa ngazimbili zonke izidalwa ezilomphefumulo wokuphila zangena emkhunjini. 16 Izinyamazana ezazingena zazingezinduna lezinsikazi ezezinto zonke eziphilayo, njengalokho uNkulunkulu ayekulaye uNowa. Yikho uJehova wasemvalela phakathi.

17 Okwezinsuku ezingamatshumi amane impophoma zaphikelela zithululeka emhlabeni, kwathi ngokwanda kwamanzi awuphakamisa umkhumbi waba ngaphezulu komhlaba.

18 Amanzi aqubuka anda kakhulu emhlabeni, umkhumbi wandenda phezu kwamanzi.

19 Aqubuka kakhulu emhlabeni, kwathi zonke izintaba eziphakemeyo ngaphansi kwawo wonke amazulu zasibekelwa. 20 Amanzi aqubuka asibekela izintaba zatshona okudlula izingalo ezingamatshumi amabili. 21 Zonke izinto eziphilayo ezihamba phezu komhlaba zabhubha – izinyoni, izifuyo, izinyamazana zeganga, zonke izidalwa ezitshatshama phezu komhlaba, loluntu lonke. 22 Yonke into ephefumula impilo ngamakhala ayo nxa isemhlabathini owomileyo yafa. 23 Yonke into ephilayo phezu komhlaba yakhukhulwa; abantu lezinyamazana lezinanakazana ezihuquzela emhlabathini kanye lezinyoni zemoyeni kwakhuculwa emhlabeni. NguNowa kuphela owasalayo, lalabo ababelaye emkhunjini.

24 Amanzi akhukhula emhlabeni okwezinsuku ezilikhulu lamatshumi amahlanu.